Dennistoun Online
Scottish Nursery Songs
printable version

On J. W. falling heir to considerable poverty.

                 
“So Johnny he's an heir!
   An’ if ye observe it,
Seldom sic gude luck
   Fa’s where they deserve it.”

Sic a hearty cheer
   Frae his trusty cronies,
Weel might warm a heart
   Caulder far than Johnny’s.

When we’re growin’ auld,
   To provide a mouthfu’
Is a weary faught,—
   No to say a toothfu’.

Then when Fortune comes
   Like a show’r in summer,
Scattering riches roon,
   Welcome is the kimmer.

He’s got bills an’ bonds.
   Three per cents, an’ real stock,
An’ as meikle gowd
   As will fill a meal pock.

Will it drive him gyte—
   Will he turn deleerit—
Will he aff to France—
   Or to some place near it?

Puddocks eat, an’ learn
   Capering an’ booin’,
Tyne his mither-tongue,
   An’ tak to parley-vooin’.

Will he treat his gab
   To their ham sae reekie,
Sup oysters wi’ a spoon
   Yet bock at cockie-leekie?

Will subscription sheets
   Handsomely be arl’d,
That his name may be
   Foremost in the “Herald?”

Will he buy a wig
   Shinin’ like a fiddle,
Specs without e’en shanks
   On his nose to striddle?

Rin an’ ring the bell,—
   Tell each worthy cronie,
Siller mak’s nae change
   For the waur on Johnnie.

Aye the hearty laugh,
   Aye the langsyne story,
Aye the tither tot,
An’ Johnnie’s in his glory!

           






Scottish Nursery Songs: Page 22 of  40